Source: Yle, Photo: Sállevári bálgosa boazoisit Iisko-Henrik Näkkäläjärvi. Govva ii laktás gumpeáššái. Govva: Kirsti Länsman / YleVahágat leat šaddan sullii 100 000 euro ovddas ja goddojuvvon bohccot leat gávdnon sullii 50 dán vahkus, muitala bálgosa boazoisit Iisko-Henrik Näkkäläjärvi.

Gumpe lea goddán olu bohccuid Sállevári bálgosis. Dál gumppe lea lohpi goddit, muhto das eai leat vel lihkostuvvan.

Gumpe lea dagahan vahágiid sullii 100 000 euro ovddas. Goddojuvvon bohccot leat gávdnon sullii 50 dán vahkus, ja juohke beaivve gávdnojit lasi, muitala Sállevári bálgosa boazoisit Iisko-Henrik Näkkäläjärvi.

– Dilli lea hui váttis. Olu lea goddán ja stuorra vahágat leat boahtán ja bohtet ain lasi juos eat fidne eret ealu siste, muitala Näkkäläjärvi.

Bálggus ozai ja oaččui spiehkastatlobi gumppe goddimii geassemánu 23. beaivvis gitta suoidnemánu 13. beaivái. Bálgosis ráddjejuvvui spiehkastatlohpeguovlu dan vuođul gos vahágat leat dáhpáhuvvan, muitala Eerojuhani Laine fuođđoguovddážis.

Näkkäläjärvi muitala, ahte sii leat geahččalan goddit gumppe, muhto bievlan dat illá lihkostuvvá.

– Iihan gumppe oainne lastameahcis. Diekko leat suhkkes vuovddit ja gumpehan gal manná suohkadassii go gullá olbmuid, iige boađe oidnosii, son muitala.

Näkkäläjärvi: gumpe gaikkoda ja goddá, muhto ii bora
Sálleváre bálgosa boazoisit Iisko-Henrik Näkkäläjärvi muitala, ahte gumpe ii leat goddima maŋŋá borran bohccuid.

– Dat lea dakkár neavrres gumpe, mii fal gaikkoda ja goddá. Máŋga gaikkodan bohcco leat boahtán gárdái ja meahcis leat gávdnon bohccot, mat ledje eallimen vel, čilge Näkkäläjärvi.

Fuođđoplánejeaddji Eerojuhani Laine dieđu mielde leamašan ovdamearkadáhpáhusat, mas gumpepárra, mii lei áiddo vuođđudeamen reviirra, lei goddán bohccuid eanet go dárbbašedje. Son ii goit váldde beali Sállevári gumppe dáhpáhussii.

Jus gumppe eai leat goddán ovdal áigemeari nohkama, de bálggus galgá ohcat ođđa lobi. Näkkäläjärvi jáhkká, ahte sii ohcet ođđa lobi jus vahágat ain šaddet, muđui dietnasa bealis šaddá váttes dilli.

– Dás lea vel guhkes áiggi bievla dassážii go muohttá. Dat dagaha nu olu vahágiid, de soaitá leat ahte čakčat eai leat olu maid vuovdit, morašta Näkkäläjärvi.

Gumpenálli lea lassánan Suomas ja boazodoalloguovllus
Gumpenálli lea lassánan olles Suomas, nu maid boazodoalloguovllus, muitala dutkanprofessor Ilpo Kojola Luondduriggodatguovddážis.

– Gumppe goddin bohccuid leat registreren maŋimuš guovtti jagis olu eanet go moaddelot jagi dassái, son dadjá.

Borgemánu 2022 maŋŋá boazodoalloguovllus leat goddán oktiibuot 48 gumppe spiehkastatlobiin. Eanemus vahágat leamašan nuortan boazodoalloguovllu máttaosiin. Gumppet johttájit boazodoalloguvlui máddin ja nuortan Ruošša bealde. Sámis leat goddán maŋimuš jagiid sullii guokte golbma gumppe, Kojola lohká.